Люксембург СІМ басшысы Қазақстандағы реформаларға қолдау білдірді
БРЮССЕЛЬ. ҚазАқпарат – Люксембург Ұлы Герцогтігінің сыртқы және еуропалық істер министрі Жан Ассельборн Қазақстан Республикасының Елшісі Марғұлан Баймұқанды қабылдады, деп хабарлайды ҚазАқпарат меншікті тілшісі.
Кездесу барысында тараптар Қазақстан-Люксембург қатынастарын дамытуға бағытталған алдағы саяси және экономикалық шараларды талқылады.
2023 жылы Люксембургтің ресми тұлғалары мен бизнес-миссияларының Қазақстанға жоспарланған сапарларына ерекше назар аударылды. Сондай-ақ, халықаралық көлік-транзиттік маршруттарды тиімді пайдалану мәселелері сөз болды.
Қазақстандық дипломат сыртқы істер министрі Жан Ассельборнға ҚР Президенті Қасым-Жомарт Тоқаевтың қыркүйек айындағы Жолдауының негізгі аспектілері, сондай-ақ елдің мемлекеттік басқару жүйесін одан әрі жаңғыртуға және қоғамның әл-ауқатын арттыруға бағытталған саяси-экономикалық өзгерістер туралы айтты.
Өз кезегінде Жан Ассельборн Қазақстанда жүргізіліп жатқан реформалардың маңыздылығын атап өтіп, Люксембург тарапының арадағы ынтымақтастықты тереңдетуге мүдделілігін атап өтті.
Тараптар жоспарланған іс-шараларды жүзеге асыру үшін тығыз байланыста болатындарын айтты.
