Макрон мен Стармер келесі аптада Вашингтонға барады
АСТАНА. KAZINFORM — Ақ үйдің баспасөз хатшысы Каролин Ливитт Трамп дүйсенбіде Макронмен және бейсенбіде Стармермен кездесетінін мәлімдеді, деп хабарлайды Kazinform тілшісі.
Франция президенті Эммануэль Макрон мен Ұлыбритания премьер-министрі Кир Стармер келесі аптада Вашингтонға барып, АҚШ президенті Дональд Трамппен кездеседі.
Сапар алдында екі еуропалық көшбасшы Украина президенті Владимир Зеленскиймен сөйлесті, ол Еуропада тұрақты бейбітшілікті қамтамасыз ету үшін сенімді қауіпсіздік кепілдігі қажет екенін атап өтті.
Үш көшбасшы Ресей мен Украина арасындағы қақтығысты тоқтату үшін бейбіт келіссөздердің перспективаларын талқылайды, деп хабарлады АҚШ-тың ұлттық қауіпсіздік жөніндегі кеңесшісі Майк Уолц.
АҚШ Еуропаның қатысуынсыз Ресеймен бітімгершілік келіссөздерді алға жылжытып жатыр деп алаңдаған Еуропалық көшбасшылар 17 ақпанда Парижде төтенше саммитке жиналды. 19 ақпанда кеңейтілген құрамдағы кездесу өтті, одан кейін Макрон Франция мен оның одақтастарының Украинаға қатысты «біртұтас» ұстанымын қуаттады.
Бұған дейін Трамптың Украинаны президенттік сайлау өткізуге шақырып, елді құтқару үшін тез арада бітімгершілік келісімін талап еткені хабарланған болатын.
