Макрон отставкаға кетпейтінін мәлімдеді

АСТАНА. KAZINFORM — Франция президенті Эмманюэль Макрон туындап жатқан саяси дағдарыс аясында өзінің отставкаға кету мүмкіндігін жоққа шығарды.

Бұл туралы Макрон JDNews басылымына берген сұхбатында айтты.

Күтілгендей, 8 қыркүйекте Ұлттық жиналыста Франсуа Байру басқарған үкіметке сенім вотумын өткізу жоспарланып отыр.

Бақылаушылар Байрудың үш ай ғана қызмет етіп, сенімсіздік вотумы арқылы отставкаға кеткен оның алдындағы премьер-министр Мишель Барньенің тағдырын қайталауы мүмкін екенін жоққа шығармайды.

Осы дағдарыс аясында Франция президенті отставкаға кету мүмкіндігін түбегейлі жоққа шығарды.

— Президент болу — бұл сені не үшін сайлаған болса, соны орындау және ең бастысы, ел үшін дұрыс деп санаған нәрсені жасау. Мен мұны алғашқы күннен бастап істеп келемін және соңғы сәтке дейін істеймін, — деді ол.

Бұған дейін солшыл «Бас имеген Франция» партиясы 23 қыркүйекте парламентке Макронды биліктен шеттету жөнінде ұсыныс енгізетінін мәлімдеген болатын.

Elabe зерттеу компаниясы жүргізген сауалнама нәтижесіне сәйкес, сұралғандардың 67%-ы президенттің отставкасын қолдайды.

Сауалнамаға қатысқандардың 69%-ы Ұлттық жиналысты таратып, парламенттік сайлау өткізу керек деп есептейді.

Сауалнамаға 1000-нан астам адам қатысқан.

Бұдан бұрын АҚШ елшісі Макронға жазған хаты үшін Францияның Сыртқы істер министрлігіне шақырылғаны белгілі болды.