Макрон зайыбы туралы жалған мәлімдеме жасаған әйелді сотқа берді

АСТАНА. KAZINFORM – Франция президенті Эммануэль Макрон мен зайыбы Брижит Макрон блогер Кэндис Оуэнске қарсы жала жабу туралы сотқа арыз берді. Бұл туралы BBC хабарлады.

Арыз АҚШ-тың Делавэр штатындағы сотқа жолданған. Онда Кэндис Оуэнс таратқан ақпарат «сандыраққа толы, жала жабуға негізделген және шындықтан мүлде алшақ» деп сипатталады.

Әлеуметтік желілерде миллиондаған жазылушысы бар Оуэнс бұған дейін бірнеше рет Брижит Макронның жынысын ауыстырғанын мәлімдеген. Сондай-ақ ол «Брижитке айналу» атты бейнероликтер сериясын жариялаған.

Аталған конспирологиялық теория бірнеше жылдан бері интернетте тарап жүр. Онда Францияның бірінші ханымы Жан-Мишель Троньё есімімен дүниеге келген делінеді. Алайда бұл — Брижит Макронның ағасының аты және теория нақты дәлелдерге негізделмеген.

Макрон жұбының мәлімдеуінше, олар адвокаттары арқылы Оуэнске бірнеше мәрте бұл жалған ақпараттан бас тарту туралы талап қойған. Алайда жауап болмағандықтан, жағдайды шешудің жалғыз жолы — сотқа жүгіну деп шешкен.

Арыз мазмұнында Оуэнс жалған мәлімдемелерін әдейі жалғастырып, жаппай жала жабу науқанын бастағаны жазылған. Сонымен қатар, ол Макрон мен Брижиттің туыстық байланысы барын, тіпті Франция президенті ретінде Макронды Орталық барлау басқармасының сананы басқару бағдарламасы арқылы таңдады деп мәлімдеген.

— Егер бұл жала жабудың айқын мысалы болмаса, онда ондай мысал мүлде жоқ, — деді Макрондар отбасын сотта қорғайтын адвокат Том Клэр.

Айта кетейік, бұған дейін Макрон балаларға неліктен әлеуметтік желілерді пайдалануға тыйым салуды ұсынғанын хабарладық.