Максим Богатырёв Аргентинада параканоэден әлем чемпионы атанды
АСТАНА. KAZINFORM — Қазір Аргентинаның Гуалегуайчу қаласында байдарка мен каноэде ескек есу марафонынан және параканоэден әлем чемпионаты өтіп жатыр. Бұл туралы ескек есу спорты түрлерінен Ұлттық федерацияның баспасөз қызметі хабарлайды.
Ерлер арасында параканоэден VL1 санатында отандасымыз Максим Богатырёв алтыннан алқа тақты. Ол жарыстың алғашқы күні 8 шақырым 200 метр қашықтықты 58 минут, 03.17 секундта бағындырды.
Максим мәре сызығын екінші кескен бразилиялық Габриэль Нунестен 9 минут, 11 секунд озып кетті.
Енді алдағы күндері Ұлттық құрама спортшысы байдаркамен жарыста бақ сынайды.
Айта кетейік, әлемдік додаға 38 елден 683 спортшы қатысып жатыр. Барлығы параканоэден 14 бағдарламада жүлде сарапқа салынады.
Еске сала кетейік, Максим Богатырёв биыл жазда Түркістан қаласында өткен лицензиялық Азия чемпионатында 2 күміс медаль жеңіп алған.
Осыған дейін Азия Пара ойындарында Қазақстанның қоржынына төрт жүлде қосылғанын жаздық.
