Қырғызстан тауларындағы ресейлік альпинисті құтқару мүмкін емес - сарапшылар
АСТАНА.KAZINFORM – «Ақ-Сай Трэвел» туристік компаниясы шақырған альпинистерден құралған сарапшылар тобы 12 тамыздан бері аяғынан жарақат алып, Победа шыңында жатқан ресейлік Наталья Наговицынаны құтқару мүмкін емес екенін мәлімдеді, деп хабарлайды Kazinform агенттігінің меншікті тілшісі.
Мәлімдемеде Победа шыңында ирандық альпинистер Пилехвари Марьям Аболхасан және Машхадьягалу Хасан Сейфолламен байланыстың үзілуіне, Ресей азаматы Наталья Наговицынаның аяғынан жарақат алуына және италиялық альпинист Лука Синигальяның денсаулығының нашарлауына байланысты (кейінірек қайтыс болды) алғашқы ақпарат түскеннен бері іздеу-құтқару операцияларына қатысқан тұлғалармен күн сайын брифинг өткізілгені айтылған.
Қырғызстанда және шетелде орналасқан, осындай операцияларды жүргізу тәжірибесі мен тиісті дайындықтан өткен, оның ішінде климаттық бейімделуден өткен, құрамына 20 маман кіретін альпинистер кеңесі биылғы маусымда іздеу-құтқару жұмыстарын жүргізу мүмкін емес екенін мәлімдеді.
— Құтқарушылардың өмірі мен денсаулығына төнген барлық қауіпті салыстыра келе, ауа райының күрделі жағдайын ескере отырып, біз биылғы маусымда іздеу-құтқару жұмыстарын жүргізу мүмкін емес деген қорытындыға келдік. Құтқару жұмыстарын одан әрі ұйымдастыру, өкінішке қарай, зардап шеккендердің одан бетер көбеюіне әкелуі мүмкін, - делінген мәлімдемеде.
Туристік компания 2025 жылдың тамызында Победа шыңында жүргізілген құтқару операциясы Орталық Азия тарихындағы ең қиын операциялардың бірі болғанын атап өтті. Оған Қырғызстаннан және шетелдік альпинистер мен мамандар қатысты.
– Қатысушылардың ерліктері мен жанкештілігіне қарамастан, ауа райының қолайсыздығы кейбіреулерін ғана құтқаруға мүмкіндік берді. «Ақ-Сай Трэвел» қаза болғандардың туыстарына қайғырып көңіл айтады және адам өмірі үшін соңына дейін күрескендерге алғысын білдіреді, - деп түсіндірді компания.
Айта кетейік, 12 тамыздан бері аяғы сынған ресейлік альпинист Наталья Наговицына 7 мың метрден астам биіктіктегі Победа шыңында көмек күтіп жатыр. Одан сәл төмен жарақат алған ресейлік әйелді Победа шыңынан алып өтпек болған италиялық альпинистің денесі жатыр.
23 тамызда Қырғыз Республикасы Төтенше жағдайлар министрлігінің құтқарушылары ауа райының нашарлауына байланысты Ресей азаматы Наталья Наговицынаны іздеуді тоқтатты.
Кейіннен белгілі болғандай, ауа райының күрт нашарлауына байланысты Қырғызстан ТЖМ «Эйрбас Н-125» тікұшағы 24 тамызда Ыстықкөл облысына жіберілген альпинистті эвакуациялау операциясын тоқтатып, тұрақты мекеніне оралды.
27 тамызда Қырғыз Республикасының Ұлттық қауіпсіздік мемлекеттік комитеті жоғары дәлдіктегі жабдықпен жабдықталған ұшқышсыз ұшатын аппараттарды пайдалана отырып жүргізген аэрофототүсірілім альпинист Н.Наговицынаның тұрған жерінде тіршілік белгілері жоқ екенін анықтады.
