Маңғыстауда 10 күн бұрын із-түссіз жоғалған тұрғын әлі табылмай жатыр
АҚТАУ. KAZINFORM — 33 жастағы ақтаулық Ерлан Есмағамбетов осыдан 10 күн бұрын «Кендірлі» демалыс базасы аумағында жоғалған.
Ол Ақтау қаласына бармақ болып, жолдан көлікке отырған. Бірақ, көп ұзамай қайта түсіп қалыпты. Содан бері хабар-ошарсыз. Облыстық төтенше жағдайлар департаментінің хабарлауынша, Жаңаөзен қаласы мен Кендірлі демалыс базасы аумағында бірнеше күннен бері іздестіру-құтқару жұмыстары жүргізіліп жатыр.
— Қазіргі уақытта іздеу-құтқару жұмыстары жалғасуда. Облыстық төтенше жағдайлар қызметі, жергілікті тұрғындар жұмылдырылды. Тікұшақпен іздеп жатырмыз. Дрондар, арнайы техника мен жабдықтар қолданылуда, — делінген хабарламада.
Жоғалған азаматты іздеуге волонтерлар да кіріскен. Алайда әзірге нәтиже жоқ. Сондықтан олар жол талғамайтын көлігі бар еріктелерді көмекке шақыруда.
— Із-түссіз жоғалған тұрғынды табу үшін Кендерлі-Жаңаөзен бағытына шыға алатын көліктер қажет. Дроны бар адамдар да көмекке келсе жақсы болар еді. Қазір кез-келген көмек маңызды, — дейді волонтерлар.
Бұған дейін, Ақтауда дәрігерлер 74 жастағы науқастың мойнынан 1 келідей ісікті алғаны туралы жазған болатынбыз.
