Маңғыстауда 280 дәрігер жетіспейді
АҚТАУ. KAZINFORM — Маңғыстауда маман тапшы. Соның ішінде 80 маман ауылдық жерлерге қажет.
— Кадр тапшылығы — медицинадағы негізгі мәселе. Өңірде 280 дәрігер тапшы, оның 200-і Ақтаудың өзінде табылмай отыр, — дейді облыстық денсаулық сақтау басқармасының басшысы Бекболат Ізбасаров.
Сондықтан аймаққа дәрігерлерді шақырып, тұрақтандыру үшін жан-жақты қолдау көрсетіледі.
— Ауылдық жерлерге жұмысқа келетін мамандарға 8,5 миллион, Жаңаөзен қаласына келетін мамандарға 5 миллион, ал Ақтау қаласына келетін мамандарға 3 млн теңгеден біржолғы әлеуметтік көмек беріледі. Медициналық ұйымдарға жұмысқа келетін жас мамандар мен шақырылған мамандарды жергілікті бюджет есебінен тұрғын үймен қамтамасыз ету мақсатында, биыл 50 қызметтік пәтер (Ақтауда 35, Жаңаөзенде 15) сатып алу қарастырылған, — дейді басқарма басшысы.
Аталған қолдаудың арқасында Жаңаөзен қаласына былтырдан бері 8 дәрігер келген. Мамандар 5 миллион теңгеден бір жолғы әлеуметтік көмекті алып, баспанамен қамтылған. Солардың бірі — Ерлан Әшірбеков. Реаниматолог дәрігер Павлодар облысы Баянауыл ауданынан арнайы шақырылған. Қазір Жаңаөзен қалалық көпбейінді ауруханасы жансақтау бөлімі меңгерушісінің міндетін атқарады.
— Маңғыстауға, оның ішінде Жаңаөзен қаласына қоныс аударуыма себепші болған осы аурухананың басшылығы мен жергілікті әкімшілік. Бір жолғы көмектерін берді. Қызметтік пәтер бергенге дейін қазіргі пәтердің жалдау құнын төлеп жатыр. Әріптестерім де, Жаңаөзеннің халқы да жылы қарсы алды. Біздің мақсатымыз — Қазақстанның қай өңірінде болсын, халыққа медициналық көмек көрсету, — дейді реаниматолог дәрігер.
Облыста тапшы мамандар: реаниматологтар, эндокринологтар, онкологтар, гематологтар, гинекологтар, травматологтар, педиаторлар, терапевтер мен жалпы тәжірибелі дәрігерлер.
Бұған дейін, Маңғыстауда Каспий теңізінде қырылған итбалықтардың зерттеу қорытындысының қашан жарияланатыны туралы жазған болатынбыз.
