Маңғыстауда 3 жасар бүлдіршін балабақшада ауыр жарақат алды

АҚТАУ. KAZINFORM — Оқиға Ақшұқыр ауылындағы жекеменшік балабақшада болған. Бүлдіршіннің бір саусағының тырнағы жұлынып қалып, зардап шеккен.

— Шамамен сағат 11:30–да тәрбиеші хабарласып, баланың қолын стақанмен кесіп алғанын айтты. Мен келгенде, саусағын шкафтың есігі қысып қалғаны белгілі болды. Тырнағы толықтай жұлынған, саусағы қатты қанап тұрды, — дейді баланың анасы.

Ата-ананың айтуынша, тәрбиеші балаға алғашқы медициналық көмек көрсетпеген және жедел жәрдем шақырмаған.

— Біз баланы өзіміз облыстық балалар ауруханасына апардық. Дәрігер жағдайдың ауыр екенін айтты. Сүйекті жабу үшін баланың білегінен тері алуға тура келді. Ота жасалмаса, саусақ жарамсыз болып қалуы мүмкін еді, — дейді баланың анасы.

Осы оқиғаға байланысты полиция департаменті қылмыстық іс қозғады. Ал, Маңғыстау облыстық білім басқармасы оқиғаның мән-жайы анықталып жатқанын хабарлады.

Бұған дейін, Ақтау қаласының прокуроры мас күйінде тәртіп бұзғаны үшін ұсталғаны туралы жазған болатынбыз.