Маңғыстауда азық-түлік қоры жеткілікті
АҚТАУ. KAZINFORM – Төтенше жағдай кезінде тұрғындар өнім тапшылығын қолдан туындату немесе бағаны негізсіз көтеру деректеріне куә болса, олар аудан әкімдіктері кәсіпкерлік және сауда басқармасы өкілдерінің көмегіне жүгіне алады.
Бұл туралы Маңғыстау облыстық кәсіпкерлік және сауда басқармасының басшысы Дастан Мұраталиев мәлімдеді.
«Өңірде су тасқыны жағдайында азық-түлік тауарлары қоры жеткілікті. Алайда, әлеуметтік желілерде азық-түлік тапшылығы туындауы ықтимал деген дәйексіз ақпарат пайда болды. Мен халықты дүрмекке ермеуге, сабырлық танытуға және ресми ақпарат көздеріне сенуге шақырамын», - деді Дастан Мұраталиев.
Егер өңір тұрғындары азық-түлік бағасының негізсіз көтерілгеніне куә болса, аудандық кәсіпкерлік бөлімдерінің қызметіне шағым түсіруіне болады.
