Маңғыстауда кен орындарының аумағынан итбалықтар табылып жатыр

АҚТАУ. KAZINFORM — Бұл туралы тәуелсіз эколог Бақытгүл Жақсылықова хабарлады.

Оның айтуынша, соңғы күндері ауа райының қатты суытуына байланысты, теңізде мұз қатып, кейбір итбалықтар мұздың үстімен жүріп, Түпқараған ауданындағы Қаражанбас кен орны аумағынан шығып жатыр. Аталған компанияның экологтары итбалықтарды өз күштерімен теңізге қайтару бойынша жұмыстанған. 

— Каспий итбалығы Қызыл кітапқа енген жануар болғандықтан, мұндай жағдайда құзырлы, уакілетті органдар (полиция, балық қорғау инспекциясы, жергілікті атқарушы орган) өкілдері шұғыл түрде су жануарын мекендеу ортасына жеткізу керек. Ол үшін шұғыл түрде комиссиямен теңіз жағалауын тексеріп шығып, әр табылған итбалық бойынша акт толтырып, фото, бейне жазба жасап, құтқару жұмыстарын атқаруды ұсынамыз, — дейді табиғат жанашыры, «Эко-Лидер» волонтерлік клубының жетекшісі Бақытгүл Жақсылықова. 

Итбалықтар Бозашы кен орны аумағынан да анықталған.

Бұған дейін, Каспий итбалығының 90 пайызға азайып кеткені туралы жазған болатынбыз.