Маңғыстаулық кәсіпкердің 500 келіден астам балығы заңсыз тәркіленген
АҚТАУ. KAZINFORM – Мұнайлы ауданының тұрғыны, жеке кәсіпкер Айжан Нұғманова балық өңдеумен айналысады. 10 ақпан күні оның Баянды ауылында орналасқан цехына ішкі істер бөлімінің 16 қызметкері келіп, жедел профилактикалық іс-шарасын өткізіп жатырмыз деп 584 келі балықты тәркілеп, алып кеткен.
Оның 400 келісі скумбрия, қалғаны бекіре тұқымдас балықтар.
- «Жігіттер, не болды?» деп сұрағанымда, «Жедел алдын алу іс-шарасын өткізіп жатырмыз, бізге жедел ақпарат түсті» деді. Сосын мен «санкцияңыз қайда?» дедім. Қандай құжаттарыңыз бар деп сұрағанымда, өздерінің қызметтік куәліктерін көрсетті. Мені цехтан итеріп, шығарып жіберді, - дейді кәсіпкер.
Кәсіпкердің айтуынша, полицейлер цехтың ішін астан-кестенін шығарып, қақталып, тұздалған балықтарды қапшықтарға салып, бүлдірген.
- Тауарды талқандаймай, мән-жәй анықталғанша мөр басып, есігін жауып кетуін өтіндім. Бірақ олар құлақ аспады. Енді ол балықтар өңдеуге келмейді. Соның шығынын өтеп берсін, - дейді жеке кәсіпкер Айжан Нұғманова.
Кәсіпкер әділдік іздеп, Бас прокуратураға шағымданған. Нәтижесінде кәсіпкердің әрекетінде қылмыстық құрам жоқ деп, қылмыстық іс тоқтатылған.
- Зерттеу нәтижелері бойынша қылмыстық құқық бұзушылықтың болмауына байланысты сотқа дейінгі тергеп-тексеруді тоқтату туралы шешім қабылданды. Кәсіпкердің құқықтары қорғалды. Ал полиция қызметкерлерінің іс-әрекеттеріне жақын арада тиісті процестік бағалау берілетін болады, - дейді Маңғыстау облыстық прокуратурасының басқарма прокуроры Ғани Боранбаев.
Кәсіпкер балық өңдеу кәсібін дамыту үшін 30 миллион теңге несие алған. Сол үшін айына 700 мың теңге төлейді. Осы оқиғаның салдарынан кәсібі тоқтап, несиесін төлей алмай қалған. Ал заңсыз тәркіленген балықтың өзі 4,5 миллион теңге тұрады.
Бұған дейін, Ақтауда мектеп оқушылары арасында жанжал болып, бір жеткіншек ауыр жағдайда ауруханаға жеткізілгені туралы жазған болатынбыз.
