Маңғыстаулық жігіттің Шымкентте қыз алып қашқан сәті видеоға түсіп қалған
ШЫМКЕНТ. KAZINFORM - Үйленбекші болған ер адам қамауға алынып, тергеу әрекеттері жүргізіліп жатыр.
Шымкент полициясы әлеуметтік желіде қыз алып қашқан жігіттің видеосын жариялады. Онда жігіт бойжеткенді көтеріп алып, оны көліктің ішіне кіргізген. Содан соң белгісіз бағытқа қарай жүріп кеткен.
Полиция оқиға туралы хабар алысымен жедел-іздестіру шараларына кірісті. Toyota Alphard көлігін ұстауға Тұран аудандық полиция басқармасының жедел уәкілдері жұмылдырылып, көрші өңірлерге бағыттама жіберілді. Қабылданған шаралардың нәтижесінде автокөлік жарты тәулік ішінде Алматы-Самара тас жолындағы Жалағаш ауылының маңында ұсталды. Ер адам қамауға алынып, тергеу әрекеттері жүргізілуде.
«Жастар әлеуметтік желіде танысқан. Бірнеше ай бойы ғаламтор арқылы сөйлескен. Содан Маңғыстау облысының 22 жастағы тұрғыны үйленуге шешім қабылдайды. Жас жігіт Шымкентке келіп, қыздың дипломалды практикадан өтіп жатқан медициналық мекемесіне барған. Анықтама бюросына «жеткізуші» екенін айтып, бойжеткенге сыртқа шығуын өтінген. Қыз далаға шыққан бойда оны күштеп көлікке отырғызып әкеткен», - делінген Шымкент қаласы полиция департаментінің баспасөз қызметі тартақан ақпаратта.
Айта кетейік, бұдан алдын Шымкентте қалыңдықты ұрлау бойынша сотқа дейінгі тергеп-тексеру басталғанын жазған болатынбыз.
