Маңғыстау облысында күнкөріс минимумы 20 мың теңгеден асты
Тұрғындардың жан басына шаққандағы осы көрсеткіш шамасы қаңтар айымен салыстырғанда 0,9%-ға өсті.
«Күнкөріс минимумы құрылымында шығындар үлесі ет және балық өнімдерін сатып алуға - 22,9%-ды, жеміс-көкөніс өнімдеріне және жеміс-жидекке - 10,4%-ды, сүт, май өнімдеріне және жұмыртқаға - 17,5%-ды, нан өнімдеріне және жарма бұйымдарына - 7,4%-ды, қант, шәй және дәмдеуіштерге - 1,8%-ды құрады», - Маңғыстау облысы статистика департаменті бағалар статистикасы басқармасының бас маманы Гүлжан Мұхтарова осы мәліметтерді хабарлады.
13 жасқа дейінгі балалар үшін күнкөріс минимумының шамасы 16 мың 262 теңгені құрайды, 14-17 жастағы жасөспірімдерге ер бала үшін - 26 мың теңгеден және қыз бала үшін - 20 мың теңгеден асады. Еңбекке жарамды 18 жастан жоғары ересек тұрғындар үшін күнкөріс минимумы жасөспірімдерге қарағанда аз соманы құрайды: ер кісілерге бұл 24 мың 571 теңге, әйел адамға - 19 мың 506 теңге. Зейнеткерлерге және қарт адамдарға күнкөріс минимумы 19 мың 385 теңгені құрап отыр.