Маңғыстауда 28 білім беру ұйымы мемлекеттік аттестаттаудан өтпей қалды

АҚТАУ. ҚазАқпарат – Маңғыстау облысында жыл басынан бері жүргізілген мемлекеттік аттестаттаудың бірінші кезеңінен 28 білім беру ұйымы өтпей қалды. Бұл туралы облыстық білім саласындағы сапаны қамтамасыз ету департаментінің басшысы Есболат Өмірзақ мәлімдеді, деп хабарлайды ҚазАқпарат тілшісі.

«Мемлекеттік аттестаттауда жалпыға білім беру стандартының орындалысы қаралады. Оның ішінде, білім беру мазмұнына, оқу жүктемесіне қойылатын талаптар тексеріледі. Оқу жоспарының орындалысы және балалардың білім деңгейі бағамдалады, яғни 4, 9 және 11-сыныптардан бақылау тестісі алынады. Аттестацияланбаған мектептерде осы тестілеудің шектік деңгейінен өтпей қалған оқушылар болды. Екінші, оқу жоспарының орындалмай қалуы және материалдық-техникалық базасының толық емес болуына байланысты кемшіліктер болды», - деді Есболат Өмірзақ өңірлік коммуникациялар орталығында өткен брифингіде.

Атап айтқанда, 21 мектеп, 31 балабақша мен 1 колледж мемлекеттік аттестаттауға қатысқан. 11 балабақша мен 16 мектеп екінші рет тексеруден өтуге мәжбүр болған. Балабақшаларды қайта аттестаттау жүргізіліп жатыр.