Маңғыстауда 70 мыңға жуық тұрғын жоғарылатылған жәрдемақы алады

АСТАНА. ҚазАқпарат - Өңірде 168 мың адам әлеуметтік төлем алады. Оның ішінде 70 мыңға жуығына 1 қаңтардан бастап жоғарылатылған жәрдемақы беріледі, - деп хабарлайды Қазақпарат тілшісі.

Атап айтсақ, асыраушысынан айырылуына байланысты 5364 адамға, 10335 көпбалалы анаға, 21600 арнаулы мемлекеттік жәрдемақы алатын тұрғынға, мүгедектігі бойынша 20193 адамға жоғарылатылған жәрдемақы беріледі.

2-топ мүгедегі Юсуп Баматгереев те осы санатта. Ол 5 жылдан бері жәрдемақы алып келеді. 62 жастағы қария келесі жылы зейнеткерлікке шығады.

«Бұрын 43 мың алатын едім, енді қаңтардан бастап 45 мың теңге. Көп болмаса да көмек қой»,-дейді ол.

Еңбек, әлеуметтік қорғау және көші-қон комитетінің МО департаменті басшысының орынбасары Айжамал Қалмағанбетованың айтуынша, тағы да өңір бойынша бала күтіміне байланысты демалыстағы 5059 әйелге ай сайынғы жәрдемақы, мүгедек баланы тәрбиелеп отырған 5000-дай адамға өсірілген жәрдемақы берілген.