Маңғыстаулық дзюдошылар халықаралық турнирдің жеңімпазы атанды (ФОТО)

АҚТАУ. ҚазАқпарат - Ақтау қаласында дзюдодан Ер Қосай Құдайкеұлы атындағы «Халық батыры» халықаралық жарысының қорытындылары шығарылды. Үш күнге созылған бәсекеге Қазақстанның Маңғыстау және Батыс Қазақстан облыстары, Тараз, Ақтөбе, Қызылорда, Атырау қалаларынан, Түркия және Әзербайжан елдерінен келген 12 салмақ дәрежесіндегі барлығы 274 спортшы (1997-1998, сондай-ақ 2002-2003 жылғы) қатысқан.

Биыл Қазақ хандығы құрылуының 550 жылдығына арналған бұл жарыс жетінші рет өтті.

«Жарыстың басты мақсаты - аталған спорт түрін кеңінен насихаттау, үздік спортшыларды анықтау. Бұдан басқа, тәжірибе алмасу. Егер әуелде жарыс республикалық деңгейде өткізілсе, соңғы жылдары оның дәрежесі халықаралық деңгейге дейін өскен. Басқа елдердің спортшылары қатысып, бір-бірлерінің жекпе-жектерін бақылап, тәжірибе алады», - деді Маңғыстау облысында бозбалалар арасындағы дзюдодан бас жаттықтырушы Манарбек Бисекенов.

Жарыстың бірінші күнінің қорытындылары бойынша Маңғыстау облысы жергілікті спортшыларының жеңістерінің арқасында бірінші жалпыкомандалық орынға шықты. Жарыстың екінші күні барлық салмақ дәрежелеріндегі жеке жекпе-жектерге арналған. Үшінші күннің жарыс қорытындысы бойынша Маңғыстаудың жарыс жеңімпазы екені белгілі болды. Облыс спортшылары 9 алтын, 6 күміс және 5 қола медаль алып, бірінші жалпыкомандалық орынды иеленді. Екінші орында Жамбыл облысы болса, үшінші орынды Атырау облысынан келген команда қанжығасына байлады.