Марат Қалқабаев істі болған Мәсімовтың мүлкіне қатысты пікір білдірді
Бүгін Мәжілісте өткен баспасөз мәслихатында тілшілер М.Қалқабаевтан К.Мәсімов ісі бойынша сұрады.
«Бұл сұрақтарды сотқа жолдау керек. Біз алдын ала тергеумен айналыстық, оны аяқтап, сотқа жібердік. Сот шешімін өздеріңіз білесіздер», — деді Марат Қалқабаев.
Сонымен қатар «оның мүлкін кім сатады» деген сұраққа ҰҚК төрағасының орынбасары бұл мәселемен сот орындаушылар айналысып жатыр деп жауап берді.
«Сот шешімінен кейін сот орындаушылары айналысады», - деп түсіндірді Марат Қалқабаев.
Ол құпия деректердің жарияланбайтынын алға тартып, істің басқа мәліметтерін айтудан бас тартты.
«Іс өте құпия, біз ештеңені жария ете алмаймыз», - деп қосты Марат Қалқабаев.
Бұдан бұрын хабарланғандай, биыл сәуір айында Астана қаласының қылмыстық істер жөніндегі мамандандырылған ауданаралық соты Ұлттық қауіпсіздік комитетінің бұрынғы төрағасы Кәрім Мәсімовке және оның орынбасарлары А.Садықұловқа, Д.Ерғожинге, М.Осиповке қатысты қылмыстық іс бойынша үкімін жария етті.
Сот шешімімен аталған үш бап бойынша да кінәлі деп танылған К.Мәсімов - 18, А.Садықұлов - 16 жылға, Д.Ерғожин тағылған айыптарға сәйкес - 15 жылға, М.Осипов болса билік пен лауазымдық өкілеттігін асыра пайдалану бабымен 3 жылға бас бостандығынан айырылды. Сотталушылардың барлығы өмір бойы мемлекеттік қызметте лауазым иелене алмайды. Сонымен қатар барлығы генерал шендерінен және мемлекеттік наградаларынан айырылады.