Мария Бровкова байдарка мен каноэде ескек есуден әлем чемпионатында үздік бестікке енді
АСТАНА. KAZINFORM — Байдарка мен каноэде есуден Қазақстан құрамасының спортшысы Мария Бровкова Польшаның Познань қаласында өтіп жатқан әлем чемпионатында үздік бестікке енді.
Спортшы бірлік-каноэде 500 метрлік қашықтықтың финалында бақ сынады.
Мария Бровкова қашықтықты 02:06.33 уақытта жүзіп өтіп, қорытынды есепте бесінші орынға тұрақтады.
Алтын медаль канадалық София Дженсенге бұйырды — 02:00.78. Венгриялық Агнес Анна Кис мәреге екінші болып жетті — 02:02.80. Үздік үштікті Беларусь өкілі Алёна Ноздрева түйіндеді — 02:04.80.
Айта кетейік, бүгін, 29 тамызда Мария Бровкова Ульяна Киселевамен бірге екілік-каноэде 200 метрге жарыстың финалында өнер көрсетеді.
Еске салайық, бұған дейін Сергей Емельянов бірлік-каноэде 200 метрлік қашықтықта жетінші орын алған еді.
