Мас күйде көлік айдаған ақтөбелік экс-депутат қоғамдық кеңестің мүшесі болды

АҚТӨБЕ. KAZINFORM – Ақтөбе қалалық мәслихатының экс-депутаты Сәния Мұратова облыстық қоғамдық кеңес мүшесі болып сайланды. 

Ақтөбе облыстық қоғамдық кеңестің төрт мүшесі тізімнен шығарылды. Оның орнына тағы 4 мүшесі сайланды. Соның бірі – былтыр мас күйінде көлік айдап, 15 тәулікке қамалған экс-депутат Сания Мұратова. Қоғамдық кеңес туралы үлгілік ереженің 39-тармағына және Ақтөбе облысының қоғамдық кеңесі төрағасының хатына сәйкес сайланған кандидаттар тізімін облыстық мәслихат парақшасынан көруге болады. 

Онда Сәния Мұратованың өзін-өзі ұсынғаны әрі фитнес желісінің құрылтайшысы екені жазылған. Сайланған кандидаттарды бекіту туралы құжатқа Ақтөбе облыстық
мәслихаттың төрағасы Гүлқасима Сүйінтаева қол қойды.

Айта кетейік, қоғамдық кеңесте 28 мүше бар. 

Еске салсақ, Сания Мұратова былтыр қыркүйекте мас күйінде көлік жүргізгені үшін ұсталды. Кейін ол мандатынан бас тарту үшін сайлау комиссиясына арыз түсірді. 

Ол ҚР Әкімшілік құқық бұзу кодексінің «Көлiк құралын жолдың жүру бөлiгiнде орналастыру, қарсы жүрiп өту немесе басып озу қағидаларын бұзу» және «Көлік құралын мас күйде жүргізу» баптары бойынша 15 тәулікке қамалды. Сонымен бірге көлік жүргізу куәлігінен 7 жылға айырылды.