Мас күйінде танысын өлтіріп, 11 жылға сотталды - БҚО

ОРАЛ. ҚазАқпарат - БҚО қылмыстық істер жөніндегі мамандандырылған ауданаралық сотының үкімімен ҚР ҚК 96-бабы 1-бөлігімен айыпты деп танылған Владимир Шуринов 11 жылға бас бостандығынан айыру жазасын қатаң тәртіптегі түзеу колониясында өтеуге сотталды.

БҚО сотының баспасөз қызметінен түскен мәліметке қарағанда, В.Шуринов бірге тұратын көңілдесімен өз пәтерінде арақ ішіп отырған кезде танысы келеді. Қонағының мұның көңілдесімен бұрыннан байланысы болса керек, соны қызғанған Шуринов танысымен сөзге келеді. Сол мезетте танысы асүй пышағын алып, Шуриновқа секірген. Сотталушы бұдан сытылып шығып, пышақты ұстап алып, қолын қайырып, арқасынан бір рет соққы жасаған. Содан кейін қылмыстық ойын ақырына дейін жеткізу мақсатында арқасынан жеті мәрте пышақ жұмсаған. Жәбірленуші сол жерде көз жұмған. Бұдан соң Шуринов пышақты пештің ішіне лақтыра салып, өзі оқиға орнынан бой тасалаған.