Матаевтар ісі. Сейітқазы Матаев 6 жылға, Әсет Матаев 5 жылға сотталды
Соттың үкімімен Сейітқазы Матаев дүние-мүлкін кәмпескелеумен және өмір бойы кәсіпкерлік қызметпен айналысуға тыйым салумен қоса 6 жылға, Әсет Матаев жеке дүние-мүлкін кәмпескелеумен қоса 5 жылға бас бостандығынан айрылды.
«Сейітқазы Матаевқа дүние-мүлкін кәмпеспелеумен, мемлекеттік және комерциялық ұйымдарда, ұйымдастырушылық-бөлушілік және материалдық жауапкершілік лауазымдармен байланысты қызмет түрлерін атқаруға өмір бойына тыйым салумен қатар 6 жылға бас бостандығынан айыру жазасы тағайындалсын. Жазасын жалпы тәртіптегі колонияда өтесін. Үйқамақ түріндегі бұлтартпау шарасы шегеріліп, сот залында қамауға алынсын»,- деген үкім кесті судья Ақболат Құрмантаев. Сонымен қатар, Әсет Матаевқа қатысты сот мынадай үкім шығарды: «Матаев Әсет Бейсенғазыұлын кінәлі деп танып, дүние-мүлкін кәмпескелеумен, мемлекеттік және коммерциялық ұйымдарда өмір бойына қызмет атқаруына тыйым салумен қоса 5 жылға бас бостандығынан айыру жазасы тағайындалсын. Жазасын жалпы тәртіптегі еңбекпен түзету колониясында өтесін».
Айта кетерлігі, судья зардап шеккен тараптардың шағымын толық көлемде қанағаттандырды. «Ақпарат және коммуникациялар министрлігінің азаматтық шағымы қанағаттандырылсын. Сейітқазы және Әсет Матаевтардан Ақпарат және коммуникациялар министрлігінің пайдасына, мемлекеттің кірісіне - 169 млн. теңге өндірілсін. «Қазақтелеком» АҚ-ның азаматтық шағымы да қанағаттандырылсын. Сейітқазы Матаевтан «Қазақтелеком» АҚ-ның пайдасына 143 млн. 960 мың 753 теңге өндіріліп алынсын»,- деді судья Ақболат Құрмантаев.
Өткен аптадағы сот отырысында мемлекеттік айыптаушы Ержан Құрақбаев Сейітқазы Матаевты 6 жыл 8 айға, Әсет Матаевты 6 жылға бас бостандығынан айыруды сұраған болатын. Ол сот тергеуі нәтижесінде тағылған айыптар бойынша Сейітқазы және Әсет Матаевтардың кінәсі толық көлемде анықталғанын және сотқа ұсынылған айыптаулардың негізінде дәлелденгенін айтты. «Матаев Сейітқазының қылмыстық әрекеттерін Қылмыстық кодекстің 190-шы бабының 4-ші тармағының 2-ші тармақшасы бойынша, яғни алаяқтық - алдын-ала бір топ адамдармен сөз байласып, алдау мен сенімді теріс мақсатқа пайдалану жолымен бөтеннің мүлкін ұрлады, өзінің қызмет бабын пайдаланып, бірнеше рет мемлекеттік сатып алу саласынан ірі көлемдегі ақша ұрлады және Қылмыстық кодекстің 245-інші бабының 3-інші тармағы бойынша, яғни аса ірі көлемдегі декларация тапсыру міндетті болған жағдайда декларация тапсырмау жолымен бюджетке салық төлеуден жалтарды деп түпкілікті белгілеу керек»,- деді сотта Ержан Құрақбаев.
Мемлекеттік айыптаушы Сейітқазы Матаевқа қатысты айыптаушы тараптың ешқандай жазасын жеңілдететін жағдайдың (мұндай жағдай Қылмыстық кодекстің 53-інші бабы бойынша қарастырылған) жоқтығын хабарлады. «Жоғарыда айтылғандардың негізінде, Қылмыстық кодекстің 58-інші бабының 3-інші тармағы бойынша Матаев Сейітқазы Бейсенғазыұлына жеке мүлкін кәмпескелеумен және өмір бойы кәсіпкерлік қызметпен айналысуға тыйым салумен қоса 6 жыл 8 айға бас бостандығынан айыру жазасын тағайындауды сұраймын. Жазасын жалпы тәртіптегі еңбекпен түзеу колониясында өтесін»,- деп мәлімдеген болатын прокурор.
Сонымен қатар, мемлекеттік айыптаушы Сейітқазы Матаевтың ұлы - Әсет Матаевты да Қылмыстық кодекстің 190-шы бабының 4-ші тармағының 2-ші тармақшасы бойынша (алаяқтық - алдын-ала бір топ адамдармен сөз байласып, алдау мен сенімді теріс мақсатқа пайдалану жолымен бөтеннің мүлкін ұрлау, өзінің қызмет бабын пайдаланып, бірнеше рет мемлекеттік сатып алу саласынан ірі көлемдегі ақша ұрлау) кінәлі деп тауып, мүлкін кәмпескелеумен және өмір бойы кәсіпкерлік қызметпен айналысуға тыйым салумен қоса 6 жылға бас бостандығынан айыру жазасын тағайындауды сұрағаны белгілі. Заң бойынша, оған да жазасын жалпы тәртіптегі еңбекпен түзеу колониясында өтеу сұралды. Алайда сот Әсет Матаевты жеке дүние-мүлкін кәмпескелеумен қоса 5 жылға бас бостандығынан айыруға үкім шығарды.
Айта кетелік, Сейітқазы және Әсет Матаевтарға «аса ірі көлемдегі бюджет қаражатын ұрлады», «салық төлеуден жалтарды» деген айыптар тағылды. Сотқа дейінгі тергеу нұсқасы бойынша, Матаевтардың барлық қылмыстық іс-қимылдарын қоса есептегенде мемлекетке 529 млн. теңгеден астам зиян келген.