Мәулен Әшімбаев Украинадағы жағдай туралы пікір білдірді

АСТАНА. KAZINFORM – Сенат төрағасы Мәулен Әшімбаев Астанада өтіп жатқан Әлемдік және дәстүрлі діндер көшбасшылары съезі хатшылығының ХХІІ отырысында Украина мен Таяу Шығыстың мәселесіне тоқталды.

«Кейінгі бірнеше жылда адамзат бұрын-соңды болмаған қиындықтарға тап келді. Бүгінгі таңда әлем жаһандық сын-қатерлер мен қауіптердің бәрі өзара шиеленіскен ахуалында тұр. Таяу Шығыста өте қиын жағдай қалыптасты. Бәріміз осы аймақтағы шиеленістің күшейгеніне қатты алаңдаймыз», - деді спикер.

Сенат төрағасы Қазақстан осы шиеленіске қатысы бар тараптардың бәрін күш қолданудан бас тартуға шақыратынын атап өтті.

«Осыған байланысты Таяу Шығыстағы келіспеушіліктерді БҰҰ Жарғысы мен халықаралық құқық қағидаттары шеңберінде тек саяси-дипломатиялық жолмен шешу үшін жедел шаралар қабылдаудың маңыздылығын атап өтеміз. Сонымен қатар, Украинада қантөгісті қақтығыс жалғасып жатыр. Жалпы, жер шарында «ыстық нүктелер» көбейіп келеді. Қақтығыстардың күшеюі соңғы онжылдықтардағы халықаралық қауымдастықтың жетістіктеріне нұқсан келтіріп отыр, қарулану жарысына және ең бастысы, бейбіт тұрғындардың қайғы-қасіреті мен шығынына әкеліп жатыр», - деді Мәулен Әшімбаев. 

Сенат төрағасы әр түрлі күштердің радикалды идеологияны ілгерілетіп, ксенофобияны қоздыруға халықаралық шиеленістерді пайдаланып жатқанын айтты. 

«Әлемде террористік және экстремистік топтар қайта жанданды. Бұл жағымсыз тенденциялар кедейлік пен теңсіздік, қоршаған ортаның нашарлауы және климаттық дағдарыс сияқты қиындықтарды күшейтеді», - деді ол.