Мажарстандағы студенттер сағатына 1672-3500 форинт табыс табады

АСТАНА. KAZINFORM — Мажарстанда студенттердің жұмыспен қамтылуы жаз айларында әдеттегідей ең жоғары деңгейге жетеді, дегенмен жастарға деген сұраныс жыл бойы сақталады, деп жазады АЗЕРТАДЖ.

BBJ басылымының сауалнама нәтижелеріне сәйкес, осы жазда елде шамамен 120 мың студент еңбек етіп жүр. Маусымдық жұмыстың ең көп шоғырланған жері — Балатон өңірі. Ал жұмыс салалары бойынша — өнеркәсіпте сұраныс жоғары, себебі бұл кезеңде қызметкерлердің көбі демалысқа шығады. Сонымен қатар он мыңдаған студент сауда мен қызмет көрсету салаларында тұрақты түрде жұмыс істейді.

Студенттерге арналған ең төменгі сағаттық жалақы — 1672 форинт (1 еуро = 401 форинт). Ел бойынша орташа жалақы 1672–2000 форинт аралығында, ал Будапештте — 2300 форинтқа дейін жетеді. Ал инженерия мен IT саласында сағаттық төлем 3000–3500 форинтқа дейін барады.

Prodiák студенттік кооперативінің дерегінше, жаз мезгілінде туризм мен қонақүй бизнесі саласына деген сұраныс 35–40% шамасында. 

— Маусым мен тамыз аралығында студенттер Балатон көлінің маңында жаппай жұмыс істейді — кафе, барлар, жағажайлар мен фестивальдерде. Кейбір қалаларда олар маусымдық жұмыс күшінің 70%-ына дейінгі үлесін құрайды, — деді кооператив басшысы Розалия Тот.

Туризм мен қонақжайлылық саласындағы орташа сағаттық жалақы — 2300 форинт.

Розалия Тоттың айтуынша, маусымдық жұмыстың қызған шағында да кадр жетіспеушілігі үнемі байқалатындықтан, студенттер жыл бойы сұранысқа ие жұмыс күші болып қала береді.

Осыдан бұрын хабарланғандай, Мажарстан паспорты әлемдегі ең мықты 7 құжаттың қатарына кірді.