Мексика мен Канадаға қатысты 25%-дық тарифтер күшіне енеді — Трамп

АСТАНА. KAZINFORM — АҚШ президенті Дональд Трамп Мексика мен Канадаға 25 пайыздық баж салығы 4 наурыз күні күшіне енетінін мәлімдеді, деп хабарлайды Синьхуа ақпарат агенттігі. 

— Бұл - өте маңызды, Канадаға 25 пайыздық және Мексикаға 25 пайыздық тарифтер енгізіледі. Бұл - тек бастамасы, — деді Трамп Ақ үйде тілшілерге. — Ашығын айтқанда, олар АҚШ-та көлік зауыттары мен басқа да нысандарды салуы керек, бұл жағдайда оларда тариф болмайды.

Сондай-ақ ол өзара тарифтер 2 сәуірден бастап күшіне енетінін растады.

1 ақпанда Д. Трамп Мексика мен Канададан әкелінетін тауарларға 25 пайыздық баж салығын, сондай-ақ Канаданың энергетикалық ресурстарына 10 пайыздық баж салығын енгізу туралы жарлыққа қол қойды.

3 ақпанда ол Мексика мен Канададан келетін импортқа қосымша тарифтер бір айға кейінге шегерілетінін хабарлады, бұл келіссөздер үшін көбірек уақыт береді.

Осы шешімге сәйкес, тиісті тарифтік шаралар 4 наурызда күшіне енеді.

Бұған дейін Трамп автомобиль, фармацевтика және чиптерге 25% баж салығын енгізбекші екенін жазған болатынбыз.