Мектеп бітіруші түлектер кештерін мектептерде ұйымдастыру жөнінде ұсыныс айтылды

АСТАНА. Мамырдың 6-сы. ҚазАқпарат /Руслан Ғаббасов/ - Бүгін елордада өткен брифингте қалалық Білім басқармасының бастығы Әсима Бимендина түлектердің кештерін мектептерде ұйымдастыру туралы ұсыныс айтты,

деп хабарлайды ҚазАқпарат. «Мектеп бітірушілердің кештері маусымның 20-ында өтеді. Енді бұл кештерді өткізетін орындарға тоқталсақ, біз бұл шараны мектептердің өзінде ұйымдастыру жөнінде ұсыныс беріп отырмыз. Аталған кешті ұстаздар, ата-аналар, түлектер қосылып мектептерде өткізулері қажет. Сондай-ақ залдары тарлау кейбір мектептер арнайы кештерді мәдениет орталықтарында, яғни Оқушылар сарайында, Бейбітшілік және келісім сарайында, театрларда өткізулеріне болады», деді Ә. Бимендина. Оның айтуынша, мектепке, ұстаздарға сыйлық тапсыру үшін ақша жинауға қатаң тыйым салынады.