Мемлекет бизнестің «қалтасына» қол сұғумен әуестеніп кетті — Жақсыбек Құлекеев
АСТАНА. KAZINFORM — Белгілі экономист, «ҚазМұнайГаз» ұлттық компаниясы төрағасының кеңесшісі Жақсыбек Құлекеев Мәжілістің Салық кодексін талқылауға арналған жұмыс тобының отырысында Үкімет бюджет тәртібін сақтамауды әдетке айналдырғанын сынады.
— Қорқудың керегі жоқ. Адамдар салықтың жоғары екеніне шағым айтады. Өйткені бәз біреулер салық төлемей отыр. Егер елде салық салу саясаты әділетті болса, бәріне бірдей жүктеме артса, ешкім ештеңеге шағымданбайды. Сондай-ақ, біз түрлі жағдайлардың әсерінен бюджет тәртібін төмен түсіріп жібергеніміз сонша, әсіресе былтыр алдыңғы жылдармен салыстырғанда 5 есе аз салық жинадық. Оның объективті де, субъективті де себептері бар. Биыл да солай жұмыс істесек, алдағы бірнеше жылда елді құртып тынамыз, — деді ол.
Сарапшы экономикадағы жеке инвестицияның үлесі азайып кеткеніне алаңдайтынын да айтты.
— Біз бизнесмендердің қалтасына заңды жолмен де, заңсыз жолмен де қол салумен әуестеніп кеттік. Олар да бұған шыдай бермейді. Былтыр экономикаға салынған жеке инвестицияның өсімі 1,7 пайыз болды. оның алдындағы жылдарда кемінде 10 пайыздан асатын. Инвестиция болмаса, болашақ та жоқ. Сондықтан Салық кодексі деген өте салмақты құжат. Оны өте мұқият таразылап қана пысықтау керек. Оның үстіне бұл қабылдағалы отырған құжат алдағы 10 жылдағы жағдайымызды айқындайды, — деді Жақсыбек Құлекеев.
Еске салсақ, 20 ақпанда Мәжіліске Салық кодексінің түзетілген жобасы енгізілген еді. Бүгін сол құжатты пысықтайтын Мәжілістің жұмыс тобы іске кірісті.
Кодекстің жаңа редакциясындағы негізгі түзетулер мыналар:
➤ Қосылған құн салығы бойынша міндетті тіркеу шегін төмендету — 20 000 АЕК (78,6 млн теңге) 3 800 АЕК (15 млн теңге) дейін;
➤ Қосылған құн салығының мөлшерлемесін арттыру — 12%-дан 16%-ға дейін, бұған қоса бірқатар сала үшін төмендетілген мөлшерлеме 10% белгіленеді;
➤ Жеңілдетілген декларация бойынша арнайы салық режимін қолдануды шектеу — тек B2C сегментіне (бизнес түпкілікті тұтынушылар үшін) қолжетімді болады.
Айта кетелік белгілі экономист Алмас Чукин Мәжілістің Салық кодексін талқылауға арналған жұмыс тобының отырысында салық реформасын кешіктіруге болмайтынын мәлім еткен еді.
