Мемлекеттік қызметкер, бухгалтер, мұғалім: Кентауда алаяқтарға кімдер көп алданады

ТҮРКІСТАН. KAZINFORM — Жыл басынан бері шағын қалада 48 алаяқтық қылмысы тіркелген.

Өткен жылдың сәйкес кезеңімен салыстырған Кентау қаласында алаяқтық қылмысы екі есеге өсіп отыр. Мәселен, 2024 жылдың екі айында қалада 24 алаяқтық қылмысы тіркелсе, биыл бұл көрсеткіш 48-ге өскен. Алаяқтық құрбандарының жас мөлшері орта есеппен 50 жасты құрайды. Ал, жәбірленушілердің көпшілігі әйел азаматтар. Ал, мамандығына орай саралайтын болсақ, мемлекеттік қызметкерлер, бухгалтерлер, зейнеткерлер мен жеке кәсіпкерлер және мұғалімдер алаяқтардың құрбаны болған. Сондай-ақ, бұл тізімде жұмыссыз азаматтарда бар. Жалпы бір жыл ішінде 80 млн теңге шығын келген. 

Бүгін қалада «Алаяқтыққа алданбаңыз!» атты іс шара өтті. Онда қала әкімі Жандос Тасов интернет алаяқтықтың жасалу жолдарын айтып, қорғану жолдарын түсіндірді. Атқарылып жатқан жұмыстар жайында мәлімет берді. 

Жиынға Түркістан облысы экономикалық тергеп тексеру департаменті аға жедел уәкілі Мұхамедали Нысанбек, қала прокурорының орынбасары Бекжан Балқыбеков, қалалық полиция бөлімі басшысының бірінші орынбасары Азамат Сарсенқұлов қатысып, көпшілікті қаржылық пирамидалар мен өзге де күмәнді инвестициялық жобаларға қаржы салмауға шақырды. Ал, банк өкілдері мен халыққа қызмет көрсету орталығының мамандары әлеуметтік желіге құжат жүктемеу, жеке электронды кілттерді ешкімге бермеу керектігін түсіндірді.

Еркін форматта өткен басқосуда интернет алаяқтықтың алдын алу бағытында видео ролик көрсетілді.

Айта кетейік, бұдан бұрын кентаулық келіншек ет сатушыларды 20 миллинон теңгеге алдап кеткенін жазған болатынбыз.