Мереке күндері Бурабайға 40 мыңға жуық адам барған

АСТАНА. KAZINFORM — Бұл өткен жылмен салыстырғанда екі есе көп, деп хабарлайды Kazinform тілшісі.

«Бурабай Даму» ЖШС баспасөз қызметінің хабарлауынша, Наурыз мейрамында шипажайға 40 мыңға жуық қонақ, 11 910 автокөлік келген.

— Ең танымал орындар дәстүр бойынша Абылай хан саябағы, Визиторлар орталығындағы шипажайдың хайуанаттар бағы, мультимедиялық интерактивті кешен және марал өсіру фермасы болып қала береді, — деп атап өтті шипажайдың баспасөз қызметі.

Наурыз мейрамының өзі демалыс орнында үш жерде тойланды. 21 наурыз күні қонақтарға «Бурабай» шипажайының Визит орталығында ұлттық тағамдар ұсынылды. Ұлттық ойындар ойнатылып, концерт қойылды.

Тағы бір мерекелік алаң — Санта резиденциясы болды, онда тәттілер де ұсынылды.

Ал 22 наурыз күні Бурабай ауылының орталық алаңында Наурыз мейрамын тойлау шарасы өтті.

2024 жылы ұлттық саябаққа барлығы миллионнан астам турист келген.

Айта кетейік, осыған дейін Бурабайда Ұлттық Құрылтайдың 4-ші отырысы өткен болатын.