Мерекеде Астана полицейлері күшейтілген тәртіпте жұмыс істейді

АСТАНА. 4 мамыр. ҚазАқпарат - Отан қорғаушылар мен Ұлы Отан соғысының Жеңісі күні мерекесі кезінде елорданың Ішкі істер департаментінің жеке құрамы күшейтілген қызмет нұсқасында жұмыс істейтін болады. Бұл туралы astana.kz сайтына қалалық ІІД-ден мәлім етті.

Аталған күндері қоғамдық тәртіп сақшылары қала аумағында күшейтілген тәртіпте кезекшілік атқарады.

Күзет нарядтарының бағдарлары мерекелік іс-шаралар өтетін жерлерге мейілінше жақын орналасады.

«Мыңнан астам полиция қызметкері мен екі жүзден астам ішкі әскер жауынгерлері іс-шаралар кезінде қала тұрғындары мен қонақтарының қауіпсіздігін қорғауға жұмылдырылады», - делінген ведомствоның баспасөз хабарламасында.

Полицейлерден басқа қоғамдық қауіпсіздікті қамтамасыз етуге жеке күзет агенттіктерінің ұтқыр топтары мен полицияның ерікті көмекшілер отрядтары да белсене қатысады.