Мерей Базарбаев әлем чемпионатында алтын медаль жеңіп алды
АСТАНА. KAZINFORM — Еркін күрестен Қазақстан құрамасының өкілі Мерей Базарбаев АҚШ-тың Лас-Вегас қаласында өтіп жатқан 23 жасқа дейінгі балуандар арасындағы әлем чемпионатында алтын медаль жеңіп алды, деп хабарлайды Ұлттық олимпиадалық комитет.
Отандасымыз 57 келіге дейінгі салмақта үздік атанды. Финалда ол түркиялық Бекир Кесерден басым түсті.
Мерей Базарбаев финалға дейін жастар арасында әлем чемпионатының жеңімпазы, америкалық Люк Лилледальды 3:1 есебімен, франциялық Расул Галбураевты 13:2 есебімен жеңді. Ал жартылай финалда жапониялық Дайто Кацумэден 7:0 есебімен басым түсті.
Айта кетейік, бұған дейін қазақстандық балуан Шұғыла Өмірбек U23 әлем чемпионатында украиналық қарсыласын 11:10 есебімен жеңіп, қола жүлдегер атанған болатын. Бұл — Қазақстан әйелдер күресі тарихындағы осы чемпионаттың алғашқы медалі.
