Мессенжерде экстремистік жазба таратқан қызылордалық әйел 3 жылға сотталды
ҚЫЗЫЛОРДА. KAZINFORM — Қызылорда облысында алауыздықты тудыратын жазба таратқан тұрғынға сот үкімі шықты.
Қызылорда облысының полиция департаменті экстремизмге қарсы іс-қимыл басқармасы қызметкерлері жедел іздестіру шараларын жүргізді.
Аталған шара барысында деструктивті діни ағым ұстанушысы, қала тұрғыны 31 жастағы әйел Telegram месенджері арқылы экстремистік материалдарды таратқаны анықталды.
Оған қатысты ҚР ҚК-нің 174-бабы 1-бөлігімен тергеу амалдары басталып, тиісті сараптамалар тағайындалды.
Нәтижесінде Қызылорда қалалық сотының үкімімен азаматша кінәлі деп танылды.
Оған 3 жыл мерзімге бас бостандығын шектеу жазасы тағайындалып, пробациялық бақылауға алынды.
Еске салсақ, бұдан бұрын Қызылордада адамдарға пышақ жарақатын салған күдікті ұсталған еді.
