Михаил Кукушкин Президент кубогы турнирінің екінші айналымына шықты

АСТАНА. ҚазАқпарат - Қазақстандық Михаил Кукушкин Астанада өтіп жатқан Президент кубогы үшін ATP Challenger Tour 50 турнирінің екінші айналымына шықты, деп хабарлайды ҚазАқпарат тілшісі.

Жарыстың бірінші ракеткасы болып тіркелген қазақстандық теннисші бастапқы кездесуін ресейлік Евгений Тюрневпен өткізді.

М. Кукушкин қарсыласын 6:2, 6:0 есебімен ойсырата ұтты.

Михаил Кукушкин ширек финалға шығу үшін үндістандық Дигвиджай Сингх немесе жапониялық Рента Токуданың біреуімен таласады.

Тимур Мәуленов жекелей сында Польша өкілі Филипп Пеливоға есе жіберді - 6:7 (4:7), 1:6.

Тағы бір қазақстандық, 19 жастағы Арысланбек Айтқұлов іріктеу сайыстарының финалында үндістандық Калианда Пуначеге жол берді - 1:6, 3:6.

Еске сала кетейік, бұдан бұрын Александр Недовесовтің әлемнің 45-ракеткасы атанғанын жазған болатынбыз.

Сондай-ақ, Юлия Путинцева Гамбург турнирінде өнер көрсетеді.