«Милтон» дауылы бәсеңсіді, алайда Флоридада 3 миллион адам жарықсыз қалды

АСТАНА. KAZINFORM – «Милтон» дауылы түнде Флорида штатының орталық бөлігімен өтіп, соңы торнадоға ұласты, штаттағы он шақты үй қирады. 3 миллионнан астам үй мен кәсіпорын жарықсыз қалды, деп жазады ВВС.

«Милтон» бесінші санатты дауыл ретінде басталды, бірақ метеорологтар дауыл құрлыққа шыққан кезде үшінші санатқа төмендегенін мәлімдеді. Ал қазір бірінші санатты деп бағаланғанымен, әлі де қауіп төндіруі мүмкін.

АҚШ Ұлттық дауыл орталығының мәліметінше, «Милтон» сәрсенбі күні жергілікті уақыт бойынша Флоридаға сағат 20:30 шамасында жеткенде, желдің жылдамдығы сағатына 195 км-ге жеткен. Ал бейсенбі күні желдің жылдамдығы 150 км/сағ-қа дейін төмендеді.

«Милтонның» соңы нөсер жауын мен жойқын дауылға ұласты. Дауыл NASA ғарыш айлағы орналасқан Канаверал мүйісінен батысқа қарай 75 км жерден өтті.

Тампа шығанағы аймағында, соның ішінде Тампа, Санкт-Петербург және Клируотер қалаларында су тасқынына байланысты төтенше жағдай режимі енгізілді. Сәрсенбіде Санкт-Петербургте 16,6 422 мм жауын-шашын болды. Қалада ауыз су жоқ.

«Милтон» Санкт-Петербургтегі «Тропикана Филд» деп аталатын 42 мың көрерменге арналған бейсбол стадионы шатырының бір бөлігін жұлып алды. Жергілікті БАҚ-тың хабарлауынша, стадион құтқарушылар үшін баспана ретінде пайдаланылған, бірақ зардап шеккендер жоқ.

Флориданың шығыс жағалауындағы Форт-Пирстегі торнадодан кейін қарттар үйінде кем дегенде екі адам қаза тапты, деп хабарлайды NBC News Сент-Люси округінің шерифі Кит Пирсонға сілтеме жасап.

Пирсонның айтуынша, 17 торнадо соққан округте шамамен 100 үй қираған.

Осыған дейін «Милтон» дауылы Флоридаға жеткенін жаздық.

Ал, Қазақстан Республикасының АҚШ-тағы Елшілігі «Милтон» дауылы Флорида штатының батыс жағалауына соғуы мүмкін болғандықтан сондағы отандастарымызға мейілінше сақ болып, жергілікті биліктің нұсқауын мүлтіксіз орындауға шақырды.