Министр доллар бағамына қатысты пікір білдірді

АСТАНА. KAZINFORM – Үкімет отырысынан кейінгі брифингте Сауда және интеграция министрі Арман Шаққалиев доллар бағамына қатысты пікір білдірді.

Брифинг барысында БАҚ өкілдері министрден: «Қазір 1 доллар 500 теңгеге жетті. Бұл ел азаматтарының төлем қабілетіне әсер ете ме? Сауда министрі ретінде пікіріңізді білдірсеңіз және Қазақстан қандай тауарды шетелден сатып алмау мүмкін? Өйткені, доллар қымбат», - деп сұраған еді.

Министр мәселенің өте өзекті екендігін жасырған жоқ. Оның атап өтуінше, доллар бағамына макроэкономикалық факторлар әсер етеді. Ал Қазақстанның импорты негізінен Еуразиялық экономикалық одақ елдерімен және Қытаймен арада жүреді.

«Олармен доллармен есеп айырыспаймыз. Мысалы, Ресеймен рубль-теңгемен, ал Қытаймен юань-теңгемен есеп айырысамыз. Біз аптасына бір рет мониторинг жасаймыз. Осы айда 0,2 пайыз өсімді байқадық. Оның доллармен байланысы жоқ. Ол маусымаралық үрдіс», - деді Арман Шаққалиев.

Бүгін Астана мен Алматы қалаларындағы ақша айырбастау пункттерінде доллар 497-502 теңге аралығында саудаланып жатқанын жазған едік.