Министр: Кей бапкерлер олимпиадалық спорт түрі бапкерінен 10-15 есе көп айлық алып жүр

АСТАНА. KAZINFORM — Туризм және спорт министрі Ербол Мырзабосынов Jibek Joly телеарнасындағы «Уәде» бағдарламасында берген сұхбатында бапкерлердің айлығын есептеудегі әділетсіздіктің сырын ашты.

«Бағдарламаға анализ жасасақ, біз 7-8 спорт түрінен әр Олимпиадада нәтиже бергенбіз. Бірақ сол спорт түрлерінің ел ішінде дамуы… Мысалы, 20 өңір 20 бағытта жұмыс істеген. 20 өңір 20 бағытта жұмыс істесе, тек қана республикалық бюджетпен Олимпиадада топ жару мүмкін емес. 20 өңір қалай бөлек жұмыс істеді? Осы жерде қателік кеткен. Мысалы, олимпиадалық емес спорт түрлеріне қаржы тым көп бөлінген. Олимпиадалық спорт түрлерінде қаражат аз болған», — дейді ведомство басшысы.

Министрдің айтуынша, қазіргі жүйеде олимпиадалық спорт түрінен жаттықтырушы болғаннан олимпиадалық емес спорт түрінен жаттықтырушы болу әлдеқайда тиімді.

«Олимпиадалық емес спорт түрлерінің ішкі жарыстарда да, халықаралық жарыстарда да нәтиже көрсеткені үшін жалақыға қосылатын пайызы олимпиадалық спорт түрлерінің үстемесімен бірдей болып қойылып кеткен. Олимпиадалық спорт түрінде 200-ге жуық мемлекет бәсекеге түседі. Олимпиадалық емес спорт түрінде 10-15 мемлекет қатысады. Қайсысында нәтиже көрсету оңай? Оның ішінде жылына екі рет Әлем чемпионаты өтетін спорт түрлері бар, мысалы. Соның бәрін жинап келген жаттықтырушы олимпиадалық спорт түрінің жаттықтырушысынан 10 есе, 15 есе артық айлық алады. Осының салдарынан бокс, жүзу, нысана көздеу сияқты спорт түрлеріне қарағанда пауэрлифтинг, армрестлинг сияқты спорт түрлері дамып кеткен. Әрине, оның бұқаралық эффектісі жақсы болуы мүмкін. Бірақ халықаралық аренада олимпиадалық спорт түрлерінің нәтижесі есепке алынады», — деді Ербол Мырзабосынов.

Сондай-ақ, ол министрлік келешекте бүкіл облыстардың спорт бюджетін қалай игеріп жатқанын Астанада отырып-ақ, тікелей қадағалап отыратын жүйе жасалып жатқанын айтты.