Министр Мұхтар Құл-Мұхаммед Монако Князьдігінің Елшісі Эвелин Жентамен кездесті

АСТАНА. 28 наурыз. ҚазАқпарат - Қазақстан Республикасының Мәдениет және ақпарат министрі Мұхтар Құл-Мұхаммед Монако князьдігінің Қазақстан Республикасындағы Төтенше және Өкілетті Елшісі Эвелин Жентамен кездеcті. Бұл туралы аталған ведомствоның баспасөз қызметінен хабарланды.

Кездесу барысында тараптар мәдениет саласындағы екіжақты қарым-қатынастардың мәселесін талқылады.

Тараптар Монаконың князі Альбер II-нің Қазақстан Республикасына 2012 жылғы қараша айында жасаған сапары екіжақты ынтымақтастыққа, оның ішінде мәдениет саласындағы қарым-қатынастарды дамытуға серпіліс бергенін атап өтті.

Кездесу барысында Астанада Монаконың Монте-Карло балетінің гастролін ұйымдастыру шаралары туралы сөз болды. Сондай-ақ, Э. Жента қазақстандық шығармашылық ұжымдардың Монакоға гастрольдерін ұйымдастыруын ұсынды.

Кездесу қорытындысы нәтижесінде тараптар мәдениет саласындағы екіжақты қарым-қатынастарды одан әрі дамытуға уағдаласты.