Министр шегірткемен күрес жұмыстары қалай жүргізіліп жатқанын айтты
АСТАНА. KAZINFORM — Ауыл шаруашылығы министрі Айдарбек Сапаров шегіртке зиянкестерімен күрес белсенді түрде жүргізіліп жатқанын жеткізді.
Министрліктің баспасөз қызметі мәлім еткендей, қазір Айдарбек Сапаров Қостанай облысы Торғай аумағында жүр.
«Қазақстан Үкіметінің қолдауымен шегіртке зиянкестерімен күрес белсенді жалғасып жатыр. Бұл мәселе Премьер-Министрдің ерекше бақылауында. Біздің алдымызда шегіртке зиянкестерімен күресті тиімді ұйымдастыру міндеті тұр. Қажетті көлемде дәрі-дәрмек сатып алу және жұмысты бастау бойынша дер кезінде қабылданған шаралардың нәтижесінде жоспарланған 2,5 миллион гектар залалсыздандыру алаңының 1,1 миллион гектардан астамы өңделді. Техника жеткілікті, өңірлер дәрі-дәрмекпен қамтамасыз етілген. Барлық өңдеу жұмыстары жоспарға сай жүргізіліп жатыр», - деді Ауыл шаруашылығы министрі.
Бұған дейін Абай облысында да шегіртке 60 мың гектар алқапқа жайылып бара жатқанын жазған едік.
