Министрлік табысын жариялаған блогерлерге қатысты мәлімет берді

АСТАНА. KAZINFORM — Қаржы вице-министрі Дәурен Темірбеков табысын ашық көрсеткен блогерлерге қатысты түсінік берді. 

— Қазір шамамен 850 блогерге хабарлама жіберілді. Оның жартысынан сәл азы, яғни 360-қа жуық блогер өз еркімен 10,5 млрд теңге сомасындағы табысын растады. Төлем 256 млн теңге (салық) болды. Бұл бағытта жұмыс жалғасып жатыр. Атап айтқанда, жалпы 850 блогер қамтылған еді, — деді Дәурен Темірбеков Парламент Мәжілісінде 2024 жылғы бюджеттің атқарылуы туралы Үкімет есебін талқылаудан кейінгі баспасөз мәслихатында.

Оның айтуынша, егер қалғандары салық төлемесе, онда заңнамаға сәйкес тиісті іс-шаралар, яғни мәжбүрлеп өндіріп алу іс-қимылдары жасалады.

Айта кетейік, бұған дейін 53,3 млрд теңгеге табысын жасырған блогерлер анықталғанын хабарлаған едік. 

Жауапты органдардың хабарламасынан кейін блогерлер миллиардтаған кірісін көрсете бастаған. 

Биыл сәуірде 338 блогер салық төледі.