Мирзиёев Арал өңірінде Климаттық технологиялардың халықаралық экспо-хабын құруды ұсынды
Арал өңірін экологиялық дағдарыс аймағынан инновация, технология және жаңа мүмкіндіктер аймағына айналдыруға ниеттіміз. Мұндай бастаманы Дубайда өткен БҰҰ-ның Климаттың өзгеруі жөніндегі конференциясының сессиясында Өзбекстан президенті көтерді. Бұл туралы Kazinform president.uz-ге сілтеме жасап хабарлады.
Шавкат Мирзиёев сөз басында климаттың өзгеруі орнықты даму жолындағы ең маңызды қатер болып отырғанын айта келе Арал қасіретінің салдарына ерекше тоқталды.
«Климаттың өзгеруінен болған теріс салдар Орталық Азияда қатты сезіледі. Бұл әсіресе Арал трагедиясына байланысты. Біздің өңірдегі ауа температурасының өсуі әлемдік орташа көрсеткіштен 2 есе жоғары. Өте ыстық күндер саны 2 есе өсті, мұздықтар массивтерінің 3/1-і еріді. Топырақтың құнарсыздануы 30 миллионнан астам адамның өміріне теріс әсер етіп отыр. Шаңды дауылдар жиіледі», - деді Мирзиёев.
Өзбекстан президенті бұл мәселені шешу мақсатында Арал өңірін дағдарыс аймағынан дамыған аумаққа айналдыру бастамасын ұсынды.
«Біз Париж келісімі аясында климаттың өзгеруіне бейімделу саласындағы жаһандық негіздемелік механизмді жедел арада келісуді қолдаймыз. Климат бойынша Орталық Азия диалогы платформасында бейімделу стратегиясын әзірлейміз. Сондай-ақ кеше қабылданған «шығын мен залал» қорын құру туралы маңызды шешімді жоғары бағалаймыз. БҰҰ Бас Ассамблеясының қарары негізінде біз Арал өңірін экологиялық дағдарыс аймағынан инновация, технология және жаңа мүмкіндіктер аймағына айналдыруға ниеттіміз. Осыған байланысты мұнда Климаттық технологиялардың халықаралық экспо-хабын құру бойынша тығыз ынтымақтастыққа шақырамын», - деп бастама көтерді Өзбекстан басшысы.
Шавкат Мирзиёев төмен көміртекті экономикаға жаһандық деңгейде көшу мәселесін де назардан тыс қалдырмау қажет екенін жеткізді. Бұл ретте дамушы елдердің мүдделерін ескеру маңызды. Оның айтуынша, аталған төңіректегі ұсыныстар «Үлкен жетілік» (G7) және «Үлкен жиырмалық» (G20) форматтарында тұрақты негізде қаралғаны жөн.
Сөз соңында Мирзиёев Біріккен Ұлттар Ұйымымен бірлесіп, 2024 жылы Өзбекстанда «Климаттық көші-қон» тақырыбында конференция өткізу жоспарланғанын жария етті.
