Міндетімізді талапқа сай атқаруға тырысамыз – қызылордалық полиция инспекторы
Учаскелік полиция инспекторы қоғамның тыныштығы мен халықтың қауіпсіздігі үшін жауапты міндет атқарады. Мұндай қарбалас тіршілік полиция қызметкеріне Жаңа жыл секілді мереке күндерінде арта түседі.
Kazinform тілшісі олардың жыл ауысар тұстағы бір күндік жұмысына зер салып көрген еді. Кейіпкеріміз - Қызылорда қалалық Полиция басқармасының учаскелік полиция инспекторы Достыбаев Мирамбек Калиядинұлы.
- Алдымен мереке күндері полиция қызметкерлері қалай жұмыс істейді ? Сол туралы айта кетсеңіз...
- Біздің қызметіміз мезгілге бағынбайды. Жүктелген жауапкершілікті сезінеміз. Тиісінше абыроймен атқаруға тырысамыз. Небір сындарлы сәттер өтеді. Қиын да күрделі кезеңдер кездеседі. Қоғамдық тыныштықты сақтауға күш саламыз. Әрине, бұл Жаңа жыл секілді мереке қарсаңында екі есеге артады десек те болады. Жылдағыдай биыл да жұмысты күшейтілген режимде атқарып жатырмыз. Бүгін осы мақсатта полиция қызметкерлері қызмет жасауда.
- Әдетте, мереке күндерінде тәртіп сақшылары күшейтілген режимде жұмыс істейтіні белгілі. Бұл уақытта қандай оқиғалары тіркеліп жатады ?
- Адам болғаннан кейін олардың мінезі де сан түрлі. Мереке күндерінде ішкілікке бой алдырып, отбасында дау шығаратын адамдар да бар. Көшеде тұрғындардың мазасын алатындар аз емес. Сондай-ақ, өзге де құқық бұзушылықтар тіркеледі. Біздің міндетіміз - түрлі оқиғалардың алдын алу, қауіпсіздікті сақтау. Бұл - күнбе-күн кездесетін жағдай. Әрбір сәтте өз міндетімізді жоғары деңгейде атқаруға тырысамыз.
- Учаскелік инспектордың міндеті қандай ? Қызмет барысында қандай қиындықтар кездеседі ?
- Учаскелік инспектордың негізгі міндеті - құқық бұзушылықтар мен қылмыстардың алдын-алу. Бұл бойынша профилактикалық жұмыс жүргізіледі. Ал қылмыс тіркелген жағдайда тергеуші немесе анықтаушымен бірге жұмыс істейміз. Сондай-ақ, басқа да қызметкерлерімен бірлесіп, оны ашу бойынша белсенді жұмыс атқарамыз.
Мен қызмет атқаратын әкімшілік аймақ -Тасбөгет кентінде орналасқан. Онда тұрғын саны - 4866 адам. Әкімшілік аймағында 1 мейрамхана, 2 кафе-бар, 17 дүкен, 1 аурухана, 2 оқу орны, 1 спорт кешені, 1 медициналық орталық, 2 балабақша орналасқан. Жыл басынан 103 хабарлама келіп түсіп, барлығына тиісті заңды шешім қабылданған.
- Жұмыс барысында тұрғындармен қалай қарым-қатынас жасайсыз ?
- Учаскедегі тұрғындар өте қарапайым, көбіне позитивті, жанашыр, түсіністікпен қарайды және жиі көмектеседі. Көбінесе бізге учаске бойынша тұрмыстық, отбасылық жанжалдар, көршілерге шағымданушылар немесе басқа да тәртіп бұзушылықпен азаматтар хабарласады.
Кейде неғұрлым ауыр құқық бұзушылықпен күресуге тура келеді. Мен адамдармен сөйлесіп, жұмысты жүйелі жүргізуге тырысамын. Өз қызметімнің ерекшелігі бойынша маскүнемдер, психикалық аурулары бар адамдармен жұмыс істейміз Профилактикалық есепте тұрған адамдар бар.
Биыл жыл басынан бері бізде 35 азамат профилактикалық есепте тұр. Олардың әрқайсысымен қарым-қатынас тәсілін таңдау маңызды. Сондықтан адам одан не қалайтынын, оны дұрыс жолға бағыттауға мүмкіндік бар екенін түсінуі керек. Нәтижелі жұмыс болу үшін ең алдымен аянбай қызмет ету керек.
- 1984 жылы 1 қаңтарда Қазалы ауданы, Бекарыстан би ауылында дүниеге келгенмін. 2008 жылдың қаңтар айынан бері Ішкі істер органдарында қызмет атқарып келемін. Отбасылымын. Жұбайым Гүлфайрус Болатқызымен 2008 жылы шаңырақ көтердім. Қазір Қаусар және Шұғыла деген қызым, Нұрислам мен Нұриман деген екі ұлым бар.
- Әңгімеңізге рақмет.
