Мол өнім алу үшін алдымен жерді құнарландыру керек - жетісулық шаруа

ТАЛДЫҚОРҒАН. ҚазАқпарат - Жетісу облысы Ақсу ауданының тұрғыны Ринат Әдеспаев - қарапайым шаруа. 10 жылдан бері дәнді дақыл өсірумен айналысады. Аграрлық саланы дамыту үшін заманауи қондырғы орнатыпты. Болашақта басқа да технологияларды сатып алуды көздеп отыр. Ерен еңбегімен көпке үлгі болған шаруамен ҚазАқпарат тілшісі әңгімелескен еді.

Ринат Әдеспаев - Абай облысының тумасы. Жетісуға көшіп келгелі 25 жылдан асқан. Құдай қосқан қосағымен 3 бала тәрбиелеп отыр. Шаруашылық саласына жастайынан араласқан азамат бүгінде 1 500 гектарға иелік етеді.

«Бізде жұмыс сағат 5:00-де жиналыспен басталады. Жігіттер жұмыстарына қарай реттеледі. Қай жұмысшы қай жаққа баратынын анықтаймыз. Сушылар суға кетеді. Фригатчиктар фригатка кетеді. Сағат 6-да жұмыс басталады. Түскі 12-ге дейін жұмыс істейді. Күн ыстықта сағат 15:00-ге дейін демаламыз. Сосын күн батқанша еңбек етеміз», - дейді шаруа.

Айтуынша, биыл 800 гектарға бидай мен соя, 50-іне жоңышқа, 25 гектарға қызылша сеуіпті. 2022 жылы су шашырататын қондырғы сатып алды. Биыл өнімнің мол шығатынына сенімді.

«Егіс алқабынан мол өнім алу үшін алдымен жерді құнарландыру керек. Сонымен қатар, ол күн райына байланысты. Адамға, жердің құнарлылығына, қарауына байланысты. Бәрі жақсы болса, жақсы өнім береді. Уақытында сеуіп, уақытында қарау керек. Уақытында химиялау керек», - дейді Ринат Әдеспаев.

Аудан орталығында ісін дөнгелетіп отырған азамат 10 адамды жұмыспен қамтыған. Болашақта шаруашылыққа жаңа қондырғылар алып, кәсібін кеңейтуді жоспарлап отыр.

Бүгінгі күні Жетісу облысында дәнді дақылдардың 173,3 мың гектары немесе 53,4% орылды, 301,7 мың тонна астық бастырылды, соның ішінде 155,8 мың тонна бидай, 145,0 мың тонна арпа, 907 тонна сұлы қамбаға құйылды. Орташа гектар өнімділігі 17,4 центнерді болып отыр.

Облыстық ауыл шаруашылығы басқармасының мәліметіне қарағанда, картоптың 500 гектары қазылып, 10,5 мың тонна, көкөніс дақылдарының 1,8 мың гектары жиналып, 52,3 мың тонна өнім алынды. Ал, бақша дақылдарының 1,2 мың гектарынан 32,8 мың тонна өнім алынды.

Егін орағына 9,7 мың трактор, 993 комбайн жұмылдырылып, бір лицензияланған астық қабылдау пункті, жалпы сыйымдылығы 501,3 мың тонна болатын 380 астық сақтау қоймасы мен 81 механикаландырылған қырман және басқа да қажеттіліктер дайындалды.

Күзгі дала жұмыстарына облысқа жалпы 7 924 тонна кепілдендірілген дизель отыны бөлінген. Бүгінгі күнге шаруашылықпен келісімшарт жасалып, жеткізу басталды.

Аграрлық несие корпорациясы арқылы көктемгі және күзгі дала жұмыстарына 85 шаруа қожалығына 1,7 млрд теңгеге жеңілдетілген несиелер, соның ішінде «Кең Дала» бағдарламасымен 800 млн теңге, «АгроБизнес» бағдарламасы арқылы 900 млн теңге берілді.

Өңірде өнім жинау әлі де жалғасып жатыр.