Моңғолияда 3333 оқушы бір мезетте «Тәуелсіздік» атты өлеңді оқыды
АСТАНА. KAZINFORM — Ел астанасының басты алаңында Моңғолияның географиялық картасы түрінде сап түзеген 3333 оқушы «Тусгаар тогтнол» (Тәуелсіздік) өлеңін хормен оқыды, деп хабарлайды Монцамэ.
Өлеңнің авторы — Моңғолияның халық жазушысы, Еңбек ері Дэндэвийн Пурэвдоржа.
2016 жылы Ұлан-Батыр қаласында «Оюуны Ундраа» орта мектебінің 3333 оқушысы алғаш рет бұл өлеңді Сухбаатар алаңында оқыды. Содан бері жыл сайын сәуір айының бірінші аптасында орта мектеп оқушылары отансүйгіштік және тәуелсіздік идеяларын поэзия арқылы жеткізеді.
Биылғы жылы «Оюун Ундра» мектебі «Тәуелсіздік 3333» бағдарламасын бүкіл елге насихаттау міндетін қойды. Соның нәтижесінде бір уақытта 21 аймақтың орталық алаңдарында өлең жолдары оқылды.
«Оюун Ундра» мектебінің директоры С. Нэргуйдаваа атап өткендей, бұл өлең моңғол мұрасын, мәдениетін, ана тілі мен жерін бейнелейді.
— Іс-шараның мақсаты — ел тәуелсіздігі мен бостандығының құндылығы мен мәнін жеткізу, өткеннің, қазіргі және болашақ ұрпақтың рухани бірлігін қамтамасыз ету, отансүйгіштікке тәрбиелеу және болашақ ұрпақ үшін ана тілі мәдениетін сақтау, — дейді ол.
Сонымен қатар мектептің 6-сынып оқушысы «Тәуелсіздік» өлеңін оқығаннан кейінгі әсерімен бөлісті.
— Мен «Тәуелсіздік» өлеңін оқи отырып, өз елімнің мұрасын насихаттағаныма өте қуаныштымын. Өлеңді екінші сыныпта жаттадым. Кішкентай кезімде оны оқып, мағынасын түсіну қиынға соқты, бірақ қазір мен оны тереңірек түсіндім. Бұл өте әдемі өлең, — деп атап өтті Аминхуслэн.
Бұған дейін Моңғолияда 2026 жыл білім беруді қолдау жылы деп жарияланғанын жаздық.
