Мұғалжар ауданында су тасқынынан зардап шеккендерге арналған 14 үйдің құрылысы жүріп жатыр

АҚТӨБЕ. KAZINFORM – Ақтөбе облысының Мұғалжар ауданында тасқын судан зардап шеккен 14 отбасығға баспа салынып жатыр. Бұл туралы Ақтөбе облысы әкімдігінің баспасөз қызметі мәлімдеді. 

«Мұғалжар ауданы бойынша су тасқыны кезінде барлығы 76 үй мен 3 коммерциялық нысанға зақым келіп, 8 шаруа қожалығы шығындалды. Су тасқынынан зардап шеккендерге 26 миллион теңгеден астам біржолғы көмек көрсетілді.Мұғалжар ауданы бойынша 7 үйге жөндеу жұмыстары жүргізіліп жатыр», — делінген хабарламада.

Бүгінгі таңда тасқын кезінде су басқан Жағабұлақ ауылында 9 үй, Бірлік ауылында 5 үй салынып жатыр. Құрылысқа «Айлин СтройПроект» ЖШС жауапты. Сонымен қатар Мұғалжар ауданында су тасқынынан зардап шеккен 55 отбасы баспаналы болды.

Баспаналы болған 55 отбасы — көктемгі су тасқынынан зардап шеккен Ембі қаласы, Жағабұлақ, Бірлік, Басшилі, Қаракөл, Шеңгелши ауылдарының тұрғындары. Оларға барлығы 971 млн. 712 мың теңгеге Болат Өтемұратов, «Қамқор Ақтөбе — 2024» және «Dar Charity» қоғамдық қорлары арқылы үйлер сатып алынып берілді.