Мұхтар Жәкішев Мәсімовтің зәулім сарайын аукционсыз сатып ала ма – өкілетті компания жауап берді

АСТАНА. KAZINFORM – Қайтарылған активтерді басқару компаниясы «Мұхтар Жәкішев Кәрім Мәсімовтің зәулім сарайын аукционсыз сатып алмақ» делінген ақпаратты теріске шығарды.

- Әлеуметтік желіде қайтарылған активтердің бірінің аукцион өткізілмей сатылатындығы, тіпті сатып алушының да бар екендігі туралы ақпарат тарады. Бұл шындыққа жанаспайды. Барлық актив активтерді басқару ережесін қатаң сақтай отырып, тек «E-Qazyna» мемлекеттік порталында ғана сатылады, - деп атап өтті аталған компанияның баспасөз қызметінен.

Айта кетейік, Ұлттық қауіпсіздік комитетінің төрағасы болған Кәрім Мәсімовке тиесілі бастапқы бағасы 1,8 млрд теңге болатын үй 25 ақпанда саудаға шығарылды.

Алайда сол кезде сатып алушы табылмады. Сондықтан 12 наурызда қайта сатылымға шығарылған еді.

Еске салайық, ҰҚК бұрынғы төрағасы Кәрім Мәсімов 2022 жылы 8 қаңтарда ұсталды.

ҰҚК таратқан мәлімет бойынша, Мәсімовтің премьер-министр лауазымында болуы кезеңінде бизнес-құрылымның бірінен астанада құны 2,5 млрд теңге элиталық тұрғын үй мен жер телімін алу фактісі бойынша тергеу жүргізілді.