СҚО-да он айда тұрғындар интернет алаяқтарға 660 млн теңгесін беріп қойған
ПЕТРОПАВЛ. KAZINFORM – Солтүстік Қазақстан облысында интернет алаяқтардан зардап шегушілер саны азаяр емес. Алдын алу жұмыстары жүргізілгенімен биылғы он айда осы қылмыстың 606 дерегі тіркелген.
Көліктегі полиция департаментінің Петропавл станциясындағы желілік полиция бөлімінің мәліметінше, былтыр өңір тұрғындары интернет алаяқтардан 577,5 млн теңге шамасында шығын шексе, биыл қаңтар-қыркүйек айлары аралығында 660 млн 330 мың теңгеден айырылған. Полицияға күнде 5 адам өзін интернет алаяқтар алдағандығы туралы забарласады екен.
«Алдын алу жұмыстары нәтижесінде 750 тұрғын өздерін интернет алаяқтарға алдауға жол бермеген. Яғни профилактиканың нәтижесі бар. Сол себепті біз Оңтүстік-Орал теміржолы Петропавл бөлімшесі жұмысшыларымен кездесіп, алаяқтар жиі қолданатын тәсілдер жайында айтып, түсіндірдік. Содай-ақ пойыздарда жолаушылармен кездесіп, буклеттер тараттық, ескерттік», - дейді Көліктегі полиция департаментінің Петропавл станциясындағы желілік полиция бөлімінің жедел уәкілі Азамат Раев.
Маманның айтуынша, интернет алаяқтар адамның жасы мен жынысын есепке алады.
«Ер адамдар көбіне Kolesa.kz сайтында жарияланған жалған хабарландырулар арқылы алаяқтарға жем болып жатады. Сондай-ақ оларға «банктің қауіпсіздік қызметінен» хабарласады.
Әйелдер көбіне әлеуметтік желі арқылы сауда жасап, алданады. Сондай-ақ оларға да «банк қызметкерлері» хабарласады.
Ал жастарды, студенттерді курьер-дроппер болуға тартады.
Зейнеткерлерге де «банктің қауіпсіздік қызметінен» және құқық қорғау органдарының «қызметкерлері» болып хабарласады», - дейді Азамат Раев.
Мәселен қазан айының басында Петропавлдың 63 жастағы тұрғынына белгісіз адам хапбарласып, өзін «Ұлттық банктің қызметкерімін» деп таныстырған. Қала тұрғынына алаяқтар оның атына 3 млн теңге несие ресімдегенін айтып, алаяқтар ол ақшаны ала алмау үшін «Хоптудеск» қосымшасын жүктеу қажеттігін айтқан. Зейнеткер нұсқауларға сүйене отырып, бағдарламаны ұялы телефонға жүктейді. Біраздан кейін оның шотынан 740 мың теңге ақшасы жоғалған. Тек банк филиалында ғана өзінің алаяқтардың құрбаны болғанын түсінген.
«Жиі кезедесетін қателіктердің бірі - банкоматтан ақша алу немесе төлем терминалдары арқылы операцияларды жүргізу кезінде азаматтар түбіртектері мен чектерін қалдырып кетеді. Бұл дұрыс емес, көптеген чектерде адамның деректері, ұялы телефон нөмірі және ЖСН-і, соңғы аударым-толықтыру сомасы көрсетіледі. Бұл - алаяқ үшін керемет мүмкіндік, болашақта сізге қоңырау шалып, өзін банк қызметкері таныстырып, сіз туралы барлық толық ақпаратты атайды және болашақта қолма-қол ақшаға қол жеткізе алады. Банктік операциялар жүргізілгеннен кейін чектер мен түбіртектерді бірге алып кетуге кеңес беремін», - дейді полиция қызметкері.
Бұған дейін СҚО-да үш аптада заңсыз аңшылықтың 100-ден астам фактісі тіркелгенін жазған едік.
