Мұнай-газ химиясын дамыту: 15 млрд доллардың 6 жобасы жүзеге асады
АСТАНА. KAZINFORM – Мұнай-газ химия өнеркәсібін дамыту Қазақстан экономикасын әртараптандырудағы басты бағыттардың біріне айналып келеді. Бұл туралы Энергетика министрлігі Мұнай-газ химиясы және техникалық реттеу департаментінің директоры Темірлан Үркімбаев айтты, деп хабарлайды Kazinform агенттігінің тілшісі.
— Біз бұл ретте мұнай-газ химия өнеркәсібі туралы жаңа заң әзірлеу жұмыстарын қатар жүргізіп жатырмыз. Тұжырымдамасы дайын, қазір жоба мемлекеттік органдарда келісу сатысында. Бұл заң 2026 жылы қабылданады деп күтілуде, — деді департамент басшысы.
Оның айтуынша, 2024 жылдың қазан айында Үкімет 2024–2030 жылдарға арналған мұнай-газ химия өнеркәсібін дамыту жөніндегі Жол картасын бекіткен. Құжат жалпы құны 15 миллиард АҚШ доллар болатын 6 ірі жобаны іске асыруды көздейді. Нәтижесінде шамамен 20 мың жұмыс орны (уақытша да, тұрақты да) ашылады.
Айта кетейік, бұған дейін «QazaqGaz» басшысы елімізде қанша газ қоры барын атап өтті.
