Мұрат Нұртілеу Ресей-Украина мәселесі туралы: үміт оты тұтанды
АСТАНА. KAZINFORM — ҚР Премьер-министрінің орынбасары — Сыртқы істер министрі Мұрат Нұртілеу Ресей мен Украина арасындағы қақтығыстың оңайлықпен шешілмейтінін айтты.
— Біріккен ұлттар ұйымы Жарғысының қағидаттарын берік ұстанатын екі мемлекеттің позициялары көптеген өзекті мәселелер бойынша ұқсас әрі үндес деу орынды. Әртүрлі мәлімдеменің сипаты мен мағынасын назарға ала отырып, Ресей-Украина мәселесі бойынша келіссөздердің басталуына үміт оты тұтана бастады. Дегенмен, бұл шешім оңай тарқатылатын түйін емес екені түсінікті. Сонымен қатар, келісімге қадам жасау, жақсы үрдіс және біз мұны мейлінше қолдаймыз, — деді Мұрат Нұртілеу БАҚ өкілдерінің алдында мәлімдеме жасай отырып.
Сонымен қатар Ресей-Украина мәселесіне қатысты Қазақстанға ресми сапармен келген Мажарстанның Сыртқы экономикалық байланыстар және сыртқы істер министрі Петер Сийярто да пікір білдірді.
— Бүгін біз Украинадағы соғыс туралы егжей-тегжейлі айттық. Соғыстың нәтижесінде біздің ел үлкен шығынға ұшырады. Сондықтан соғыс мүмкіндігінше ертерек аяқталып, бейбіт келісімге қол жеткізуіне қызығушылық танытып отырмыз. АҚШ-тың жаңа президенті және оның бейбітшілік саясаты бізге мүмкіндік береді. Сондықтан біз Ресей мен АҚШ арасындағы диалогты жоғары деңгейде құптаймыз, — деді Питер Сийярто.
Сондай-ақ шетелдік мейман кейбір саясаткерлердің қақтығысты бейбіт жолмен шешуге жол бермеуге тырысып жатқанын айтты.
— Парижде соңғы жылдары үнемі отқа май құйып жүргендер кездеседі, олар соғысты қолдайды. Бұл соғыстың өршуін үнемі арттырып келе жатқан елдер, — деп толықтырды Венгрияның сыртқы істер министрі.
Одан бөлек, ҚР Премьер-министрінің орынбасары — Сыртқы істер министрі Мұрат Нұртілеу Таяу Шығыстағы жағдайға алаңдаушылық танытты.
Айта кетейік, Мажарстанның президенті Тамаш Шуйок және Парламент спикері Ласло Кевердің Қазақстанға ресми сапарпен келеді.
