Мысыр елшісі Астанадағы мамандандырылған ХҚО-да жүргізуші куәлігін ауыстырды

АСТАНА. ҚазАқпарат - Мысыр Араб Республикасының Қазақстандағы елшісі елордадағы мамандандырылған Халыққа қызмет көрсету орталығында жүргізуші куәлігін ауыстырды. Бұл туралы «Азаматтарға арналған үкімет» мемлекеттік корпорациясының қоғаммен байланыс департаментінің директоры Мұрат Жұманбай Фейсбуктегі өз парақшасында жазды, деп хабарлайды ҚазАқпарат тілшісі.

«Бүгін Мысырдың Қазақстандағы елшісі Камел Ибрахим Хайсам Салах мемлекеттік қызметтің көрсетілу сапасын байқап көру үшін елордадағы мамандандырылған ХҚО-ға келіп, жүргізуші куәлігін ауыстырды. Өзінің ең алғашқы жүргізуші куәлігін елші Қазақстанда әрі мамандандырылған ХҚО-лар жоқ кезде ресімдеген болатын. Бүгін оны ауыстыру кезінде сервистің көрсетілуі мен уақытына таңғалып қайтты», - деп жазады Мұрат Жұманбай.

Оның жазуынша, жарты сағат өтер-өтпестен мемлекеттік корпорацияның қызметкерлері мысырлық елшінің қолына жаңа құжатын ұстатқан. Өз кезегінде елші сапалы әрі сыпайылықпен көрсетілген қызмет үшін алғысын білдірді.