Наразы топ Бангладештің бұрынғы премьер-министрінің үйін өртеп жіберді

АСТАНА.KAZINFORM - Бангладеште наразылық білдірушілер биліктен қуылған премьер-министр Шейх Хасинаның бұрынғы үйін, сондай-ақ оның партиясының басқа да мүшелерінің үйін қиратып, өртеп жіберді, деп жазады ВВС.

Тәртіпсіздіктер Хасинаның әлеуметтік желі арқылы ұлтқа үндеу жасамақ екені туралы хабарламалардан кейін басталды. Ол өткен жылы студенттік наразылықтар салдарынан елден кетуге мәжбүр болып, қазір Үндістанда қуғында жүр.

Сәрсенбі күні кешке Хасинаның марқұм әкесі, Бангладештің бірінші президенті болған Муджибур Рахманның үйі қиратылды. Ғимарат бұл күндері мұражайға айналған еді.

Хасинаның әкесі тәуелсіздік үшін күрескен қаһарман саналғанымен, қызына деген наразылық оның даңқына көлеңке түсірді.

Facebook арқылы тікелей эфирге шыққан Хасина шабуылды айыптап, «әділеттілік» талап етті.

- Олар ғимаратты қиратуы мүмкін, бірақ тарихты өшіре алмайды, - деді ол.

Сәрсенбі күні наразылық білдірушілер «Авами лигасы» партиясы көшбасшыларының үйлері мен бизнестерін қиратып, өртеп жіберді.

Полиция ВВС-ге сәрсенбі күні кешке резиденция алдына 700-ге жуық наразылық білдіруші жиналғанын және тәртіп сақтау үшін полиция қызметкерлері тартылғанын айтты.

Айта кетейік, Бангладеш премьер-министрі Шейх Хасина жүздеген адамның өліміне әкелген жаппай наразылықтар аясында отставкаға кетіп, елден кеткен еді.